ភ្នំពេញ៖ ឧបនាយករដ្ឋមន្រ្តី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល បានឱ្យដឹងថា គម្រោងផ្លូវជាតិលេខ៧ ពីរមៀតទៅច្រកព្រំដែនត្រពាំងក្រៀល អាចនឹងបើកការដ្ឋានក្នុងឆ្នាំ២០២៤នេះ។
លោក ស៊ុន ចាន់ថុល ឡើងលើកដូចនេះក្នុងឱកាសចូលរួមពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសាធារណការ និងដឹកជញ្ជូន នាថ្ងៃទី២៩ ខែកុម្ភៈ ឆ្នាំ២០២៤។
លោកបានឱ្យដឹងថា ចំពោះការសាងសង់កំណាត់ផ្លូវជាតិលេខ៧នេះ កំពុងរង់ចាំជំនួយឥតសំណងពីភាគីចិន ខណៈភាគីចិនបានផ្ដល់ព័ត៌មានថាឈានដល់ដំណាក់កាលពិនិត្យចុងក្រោយ និងអាចបើកការដ្ឋានសាងសង់ក្នុងឆ្នាំនេះ។
លោកថា៖ «គម្រោងមួយទៀតគឺផ្លូវជាតិលេខ៧ ផ្លូវពីរមៀតទៅត្រពាំងក្រៀលក៏មានការទិទៀនពីប្រជាពលរដ្ឋ សូមជំរាបដែរថាក្រសួងសាធារណការ បានសិក្សាហើយរង់ចាំជំនួយឥតសំណងពីមិត្តចិន ខ្ញុំសូមជម្រាបថាមិត្តចិនបានផ្តល់ព័ត៌មានមកថា ជាដំណាក់កាលចុងក្រោយហើយអាចនឹងឈានទៅរកការប្តូរគ្នា ឯកសារគ្នាទៅវិញទៅមកទាក់ទងនឹងជំនួយឥតសំណងនៅឆ្នាំនេះអាចឈានទៅដល់ការបើកការដ្ឋាននៅឆ្នាំនេះ នេះបើតាមព័ត៌មានដែលមិត្តចិនបានផ្តល់មកយើង»។
គួរឱ្យដឹងដែរថា ក្នុងដំណើរចុះត្រួតពិនិត្យស្ថានភាពគម្រោងសាងសង់កំណាត់ផ្លូវជាតិលេខ៧ ប្រវែង ៩៣,៥៦៥គ.ម នៅខេត្តក្រចេះ កាលពីរសៀលថ្ងៃទី២៤ ខែកុម្ភៈ ឆ្នាំ២០១៩ រដ្ឋលេខាធិការក្រសួងសាធារណការនិងដឹកជញ្ជូន លោក លឹមស៊ី ដេនីន បានបញ្ជាក់ឱ្យដឹងថា ភាគីចិនបានសន្យាបន្តសាងសង់កំណាត់ផ្លូវជាតិលេខ៧ ប្រវែង ៩៦ គីឡូម៉ែត្របន្ថែមទៀត ភ្ជាប់ពីចំណុចរមៀត ឃុំអូរគ្រៀង ស្រុកសំបូរ ខេត្តក្រចេះ ដល់ព្រំដែនប្រទេសឡាវ តាមរយៈឥណទានជំនួយឥតសំណងរបស់រដ្ឋាភិបាលចិន៕
